Родословие литовских князей (следующее за "Повестью о разделении вселенной Ноем")

Основной текст: Список БИЛ, собрание Ундольского, № 850

В лето 6820^* по пленении безбожнаго Батыя избежа от плена его некий князь именем Витенец, рода смоленьскых князей, и вселися в Жомоти у некоего бортника. И поят у него дщерь в жену себе и пребысть с нею 30 лет бездетен. И убьен бысть громом. И последи князя Витенца поят жену его раб его конющець именем Гегиманик. И роди от нея 7 сынов: 1. Родиминтик, 2. Евнутик, 3. Олгерд, 4. Кестутик, 5. Скиригалик, |л. 28| 6. Кириядик, 7. Мамонтик.

^* (Последняя цифра непонятна в рукописи.)

О великом княжении володимерском. В лето 6825 князь Юрий Данилович московскый да князь Михаил Ярославич Тверскый поидоша в Орду о великом княжении в споре. И князь Михаил Ярославич Тверской убьен бысть в Орде. А князь Юрьи Данилович прииде на великое княжение. И виде многы грады запустевша и людей събирающеся мало, печалию одеръжим бе. По убьении бо князя Михаила Черниговскаго разсыпашася измаилтяне по всей земли Русской, яко птици полетеша. И христианьский род овех мечем закалающе, другых же в |л. 28 об.| плен отвожаху, а оставшая смерть и глад погубляше. Сия случишася нам грех ради наших.

Великый же князь нача разсылати по городом и по местом собрати оставшая люди. Посла убо сего Гегиманика на Волынскую землю и на Киевьскую наполняти плененые грады и веси, а уставших имати дани царьскиа. И с ним посла некоего мужа именем Бореска и иных множайших. Сей же реченный Гегименик бе муж храбр и велика разума, начя брати дани на людех и съкровища изыскивати и обогатиоя велми. И собра к себе множество |л. 29| людей, и дая им потребнаа неоскудно, и нанят владети многыми землями. И назвася от них великий князь Гегиман литовскый Первый русских государей великых князей несъглаеьем и междоусобными бранми, раб их назвася тако и начя княжити в Литве.

О великом княжении володимерьском и московском. В лето 6859-е князь великий Семен Ивановичь седе на великом княжении владимерском и московском. В то же лето преставися Гегимант, князь литовский Первый. И по нем сяде на великом княжени сын его Наримант. И бысть |л. 29 об.| ему брань с иноплеменники, и впаде в руце их. В то же время бывшю великому князю Ивану Даниловичю в Орде, и откупил князь великий Нариманта у татар и отпустил к Литве. Он же по своему обету, не дошед вотчины своея, крестися, и наречен бысть во святом крещении Глеб. И того ради братья его не дашя ему великого княжениа.

Но седе на великом княжении брат его Олгерд, а Наримант, брат его, нареченный во святом крещении Глеб, отъиде в Великий Новъград, Евнут вселися, идеже ныне Вилна, а Скиригайло з братом своим с Кестутем всели|л. 30|шяся при некоем озере за 20 верст от Вилны. И въста Скиригайло на брата своего Кестутя и уби его. Сын Кестутиев Витофт бежа в немци и тамо собра себе друзи мнози, и пришед оттуду, и уби дядю своего Скиригайла и два сына его. И вселися на месте отца своего и дяди своего, и нарече имя месту тому Троки, и съвокупися любовию с дядею своим о Олгердом. Той же Олгерд вина не пьяше и велик разум имяше, земля же и княжениа притяжа к себе многы и удержа велию власть.

Князь великий Олгерд литовьский |л. 30 об.| прислал о миру к великому князю Семиону Ивановичю московскому. В лето 6858 князь великий Олгерд литовский приела послы своя к великому князю Семиону Ивановичю на Москву с многими дарми, прося мира и живота братьи своей. Князь великий Семион пожаловал Олгерда и братию его Кориада и иных отпустил к нему. И пакы второе прислал Олгерд к великому князю Семиону Ивановичю, прося за себя свести его дщери великаго князя Александра Михайловичя Тверскаго. И князь великий Семион по благословению отца своего Феогна|л. 31|ста, митрополита всея Русии, вдасть за него свееть свою великую княжну Ульанию. И родишася от нея 7 сынов: 1. Андрей Полотцкий, 2. Владимер Белский, 3. Иван Острожский, 4. Яков, 5. Легбен Волынский, 6. Василей Черторижский, 7. Олерко Киевский.

По сем времени мало преиде, князь великий Олгерд впаде в недуг и начят сыновом своим ряд: Иакова сына своего възлюби паче всех и даде ему великое княжение и град Вилну, а прочих сынов своих по уделом устроив. Благоверная же великая княгини Улианиа виде своего мужа Олгерда последне дышу|л. 31 об.|ша и печаловашеся о спасении его и съзва сыны своя и отца своего духовнаго призва, Давыда архимандрита печерекаго. И у веща своего мужа Олгерда съветом благым и божиим поспешением, сподоби его святого крещениа. И наречен бысть в святом крещении Александр. И после того великим чином одеяся, святою схимою, великым аггилскым образом, украсився, и вместо Александра Алексей наречен бысть; и по малех днех и преставися, и положишя тело его в церкви святыя богородица, юже сам создал. По сем же и супружница его, благовернаа великаа кня|л. 32|гини Улианиа, немного время пожив, преставися, и в то же церкви погребошя тело ея. Иаков же, сын Олгердов, впаде в латынскую прелесть - Ягайло же великий князь литовскый, бысть советник и друг безбожному царю Мамаю, его же победил за Доном великий князь Дмитрей Иванович. Витофт же Костутьевич съвокупися любовию с Ягайлом. И по сем Ягайло взят бысть в Краков и коруноваше его кралем полскым в Кракове, а на Вил оставил брата своего Витофта. Витофт же устройся на Вилне князь велики литовский и нача созида|л. 32 об.|ти грады многыя, заруби Киев и Чернигов и взял град Брянеск и Смоленеск, и приступишя к нему вси князи погранические с вотчинами от Киева даже и до Фоминьского приложишяся к Витофту.